Facebook սոցիալական ցանցը հազիվ էր հասցրել հայտարարել բորսայում իր բաժնետոմսերը տեղադրելու մասին, երբ դրանք արդեն սկսեցին վաճառել ճարպիկ ամերիկացիները: Իհարկե, կեղծ բաժնետոմսերը: Ամերիկյան Վիսկոնսին նահանգի բնակչուհի 46-ամյա Մերիեն Օլեսոնը կարողացել է Facebook ընկերության բաժնետոմսերը վաճառել 75 հազար դոլար ընդհանուր արժեքով: Օլեսոնը ծանոթներին համոզել է, որ սոցցանցի 1 մլն դոլար արժողությամբ բաժնետոմսերը տնօրինում է շնորհիվ նրա, որ իր դուստրը ընկերության հիմնադիր Մարկ Ցուկերբերգի մտերիմն է, եւ բաղձալի բաժնետոմսերը «շահավետ գնով» վաճառել է նրանցից առավել միամիտներին: Օլեսոնի զոհերի թվում նրա տունը վերանորոգող բանվորն է եղել: Կինը նրան վճարել է 14 հազար դոլարի կեղծ արժեթղթերով: Բացի այդ, միամիտ բանվորը եւս 10 հազար դոլար կանխիկ գումար վճարելով կնոջից լրացուցիչ բաժնետոմսեր է գնել: Բայց ինչ-որ բան է կասկածել, երբ գործարքի վերաբերյալ իրեն տրամադրված փաստաթղթերում նկատել է «որոշ տարօրինակություններ»: Օլեսոնը նաեւ մեղադրվում է .Վիսկոնսին նահանգի 66-ամյա բնակչին խաբելու համար, որը նրան 43 հազար դոլարի կտրոն է տրամադրել Facebook-ի «բաժնետոմսերի» դիմաց: Օլեսոնը խոստացել է նրան փոստով ուղարկել բաժնետոմսերի տնօրինման իրավունքի վկայականը, ինչն, իհարկե, չի արել: Բացի այդ, ամերիկուհին մեղադրվում է սոցիալական ցանցի 9,9 հազար դոլարի չափով կեղծ բաժնետոմսերը եւս երկու անձանց կեղծիքով վաճառելու համար, գրում է ԻՏԱՌ-ՏԱՍՍ-ը: Հիշեցնենք, փետրվարի 1-ին Facebook սոցիալական ցանցը հայտ էր ներկայացրել ԱՄՆ արժեթղթերի եւ բորսաների հանձնաժողովում իր բաժնետոմսերի հրապարակային տեղակայման համար: Սոցցանցը նախատեսում է բաժնետոմսերը վաճառել 5 մլրդ դոլարով: Որոշ աղբյուրների տվյալներով` այդ գինը կարող է բարձրանալ մինչեւ 10 միլիարդի:
Մեկնաբանություններ նյութին: 0