ՀՀ կրթության, գիտության, մշակույթի, սպորտի նախարարությունն այսօր տեղեկացրեց, որ ընդունելության քննությունից դրական միավոր ստացած, սակայն մրցույթից դուրս մնացած դիմորդները կարող են մասնակցել թափուր տեղերի մրցույթին: «Դիմորդները մասնագիտությունների նշումով նոր դիմում-հայտը կարող են Գնահատման և թեստավորման կենտրոն ուղարկել էլեկտրոնային (առցանց) եղանակով՝ dimord.am կայքի համապատասխան բաժնում, հուլիսի 20-ից մինչև հուլիսի 22-ը, ժամը 18:00-ն: Բուհերում լրացուցիչ փուլի մրցույթի արդյունքները կհրապարակվեն հուլիսի 25-ին»,- ասված է հայտարարության մեջ: Ի դեպ, կայքում մանրամասն նշված է, թե որ բուհի որ ֆակուլտետներում են մնացել թափուր տեղեր, և որքան են դրանք: Այսպիսով, Երևանի պետական համալսարանում ամենաշատ թափուր տեղերը մնացել են «Ֆիզիկա» մասնագիտությունն ընտրողների համար՝ 29 տեղ, Հայաստանի ազգային պոլիտեխնիկական համալսարանում ամենաշատ թափուր տեղերը մնացել են «Փոխադրումների և ճանապարհային երթևեկության կազմակերպում և կառավարում» բաժնում, Ճարտարապետության և շինարարության Հայաստանի ազգային համալսարանում կա շուրջ 8 մասնագիտության թափուր տեղ, «Շինարարություն» մասնագիտության բաժնում թափուր է 410 տեղ, Հայկական պետական մանկավարժական համալսարանի «Պատմություն» բաժնում կա 64 թափուր տեղ, Երևանի Վալերի Բրյուսովի անվան պետական լեզվահասարակագիտական համալսարանում էլ ամենաշատ թափուր տեղերը մնացել են «Մասնագիտական մանկավարժություն, գերմաներեն լեզու և գրականություն» բաժնում՝ 47 տեղ: Շիրակի պետական համալսարանում «Տարրական մանկավարժություն և մեթոդիկա բաժնում» թափուր է 21 տեղ: Հայ-ռուսական համալսարանում մնացել է 8 թափուր ֆակուլտետ, որոնց թվում են՝ քաղաքագիտություն, զբոսաշրջություն, ֆինանսներ, թյուրքագիտություն, արաբագիտություն, հնդկագիտություն, իրանագիտություն: Թափուր տեղեր կան նաև մարզերի բարձրագույն ուսումնական հաստատություններում։