Բոլոր հայագիտական առարարկաները և ընդհանրապես բոլոր առարկաները վերանայվելու են, առհասարակ բոլոր ուսումնական ծրագրերը վերանայվելու են և մինչև 2023 թվականը ունենալու ենք լրիվ նոր առարկայակայացանկ:
Այս մասին լրագրողների հետ զրույցում կառավարության նիստից հետո ասաց ՀՀ կրթության և գիտության նախարար Արայիկ Հարությունյանը՝ անդրադառնալով «Հայոց եկեղեցու պատմություն» առարկային:
«Կան բողոքներ՝ ծանրաբեռվածության հետ կապված, անհամապատասխանելության հետ կապված, տարբերվող առարկաներում նույնաբովանդակ նյութերի հետ կապված»,-ասաց նա:
հարցին, թե դասագրքերից էլ շատ բողոքներ կան, այդ առումով փոփոխություններ սպասվո՞ւմ են, և դա ինչ ծախսեր կբերի, Արայիկ Հարությունյանը համաձանեց, որ դա լրացուցիչ ֆինանսական ծախսեր կպահանջի պետությունից: «Վաղը կոնկրետ քննարկում ունենք՝ դասագրքերի հետ կապված, դասագրքերի ծանրության հետ կապված բողոքներ կան, և գուցե որոշում լինի երկհատոր դարձնել՝ առաջին կիսամյակին՝ մեկ հատորը, երկրորդ կիսամյակում՝ երկրորդ հատորը»,-ասաց նա:
Արայիկ Հարությունյանը, անդրադառնալով դպրոցներից մեկում քահանայի հետ ունեցած միջադեպին, ասաց, որ երբ այցելել է դպրոց, հարցրել է տնօրենին, թե ինչ գործառույթ ունի քահանան: «Խոսակցությունը եղել է դասղեկական ժամերին նրա ներկայության մասին, որը մեծ խնդիր է, իսկ դասղեկական ժամերը կազմակերպչական ծրագրեր իրականացնելու համար են և ոչ թե հոգևոր քարոզի համար»,-ասաց նա:
Նախարարը հաստատեց, որ քահանային ասել է, որ դպրոցը աշխարհիկ կառույց է, և կոչ արեց հետաքրքրվել, թե ինչ տեսակ մարդ է Տեր Դավիթը: «Ես սպասում եմ, որ ընդհանրապես այդ միջադեպի հետ կապ չունեցող քահանաները պետք է ներողություն խնդրեն»,-ասաց նա՝ ի պատասխան դիտարկմանը, թե քահանաները նախարարից սպասում են ներողության:
Ըստ նրա՝ նախորդ կառավարության թողտվությամբ որոշ խմբեր չեն հարգել Հայաստանի Հանրապետության Սահմանադրությունը: Արայիկ Հարությունյանը նշեց, որ ամեն ամիս նվիրելու է մեկ մարզի:
Անդրադառնալով «Շախմատ» առարկային՝ նախարարը նշեց, որ ծնողների կողմից կան բողոքներ այս առումով ևս ու քննարկվող առարկաների մեջ նաև «Շախմատը» կլինի, բոլոր առարկաները կլինեն, բոլորի ծրագրերը փոխվելու են:
Մեկնաբանություններ նյութին: 0