Նյու Ջերսիի Բերգենի համայնքի քոլեջի «Բերգեն» պատկերասրահը, համագործակցելով քոլեջի խաղաղության, արդարության եւ հաշտեցման կենտրոնի հետ, կհյուրընկալի «Ճեղքված պատմություն. վերակառուցված ինքնություն. Հայկական նկարչության արեւմտականացման աստիճաններըլ» խորագրով ցուցահանդեսը:
Ինչպես հաղորդում է «Արմենպրես»-ը` վկայակոչելով The Paramus Post-ը, պատկերասրահը կբացի ցուցահանդեսը 2012 թ-ի ապրիլի 3-ին: «Բերգենի» պատկերասրահում ցուցահանդեսը կշարունակվի մինչ ապրիլի 26-ը: Բազմաթիվ գրքերի հեղինակ եւ գիտնական Փիթեր Բալակյանը հանդես կգա ելույթով` ապրիլի 26-ին միջոցառման փակման արարողության ժամանակ:
Ցուցահանդեսը բաղկացած է հայ արվեստագետների կողմից ներկայացված ժամանակակից նկարներից, քանդակներից եւ այլ աշխատանքներից: Այստեղ ներկայացվող աշխատանքները ցույց կտան, թե որքանով են դրանք կապված հայկական մշակույթի հետ: Չնայած 20-րդ դարում Հայաստանի բուռն զարգացող պատմական փուլերին` վերջին երկու տասնամյակների արվեստի գործերը ցույց են տալիս հայկական մշակույթի փառասիրության, նորարարության եւ առաջընթացի նշաններ: Ցուցահանդեսի պատասխանատու Վիկի Շողագ Հովհաննիսյանն ավելի քան 30 տարի է` հայկական եւ արեւմտյան արվեստի աշխատանքների հավաքածու ունեցողներից է: Հովհաննիսյանի ցուցահանդեսը հայ արվեստագետներին հնարավորություններ կտա ունենալ նոր ձեռքբերումներ, որոնց ճեղքված պատմությունը եւ վերակառուցվող ինքնությունը դեռեւս պետք է համընդհանուր գնահատվի եւ մշակութապես ճանաչվի:
Բերգենի համայնքի քոլեջը հասարակական երկամյա քոլեջ է, որտեղ սովորում են ավելի քան 17 հազար ուսանող: Այստեղ 2009-ին հիմնադրված «Բերգեն» պատկերասրահի խաղաղության, արդարության եւ հաշտեցման կենտրոնը զարգացնում է հմտություններ, որոնք անհրաժեշտ են խաղաղության, հաշտեցման եւ արդարության հասնելու համար, որտեղ հատուկ ուշադրություն է դարձվում հայկական պատմությանը եւ մշակույթին:
www.armenpress.am
Մեկնաբանություններ նյութին: 0